Rouban dúas vacas dunha explotación familiar de Caldas de Reis

Parte da cabana pertencente á explotación gandeira que teñen Charo e Rafael pasta en Godos, lugar de Caldas de Reis. A parella leva quince anos dedicados á crianza de vacún para carne e estes días están a vivir unha situación novidosa. Desde a noite do domingo ao luns fáltanlles dúas vacas que deixaran atadas nunha leira próxima, en Saiar.

Teñen moi claro que llelas roubaron e así o denunciaron ante a Garda Civil, que agora revisa a gravación de videovixilancia da zona. Foi unha veciña quen alertou á mañá de que faltaban dúas vacas do grupo.

"Chamou a veciña e díxome que faltaban dúas vacas das catro que estaban atadas, cada unha á súa estaca. Sorprendeume, porque (á noite) quedaran alí as catro. Fun ata alí e, efectivamente, faltaban dúas, as mellores", explica Rafael Pazos, o gandeiro vítima do roubo.

Fala da fenda económica que lles supón e destaca que os ladróns foron polas doadas e valiosas: "Levaron as dúas mellores; as máis grandes e máis gordas. Claro, estaban atadas. Chegaron alí, as vacas mansiñas... colleron e leváronas sen impedimento ningún. O valor é de dous mil euros para enriba cada unha. Catro mil euros as dúas".

Os animais roubados están provistos de crotal como corresponde, e os donos están a facer indagacións na procura das vacas. Unha delas entende por Castaña: "É unha vaca grande, cun corno máis grande que o outro, porque lle rompeu un cando as merquei", explica Rafael, e engade que "a máis clariña chámase Blanca e ten os cornos grandes botados para adiante e volteados cara a enriba. As vacas están mantidas, están boas".

Rafael considera que quen roubou das súas dúas vacas foron ao fácil para ladróns nocturnos: animais mansos, atados e próximos a un camiño para cargalos nun vehículo.