Rouban nunha igrexa de Amoeiro varias cruces, un caliz e unha pía bautismal

Había varios anos que non roubaban na igrexa de Santa Mariña de Fontefría, no concello de Amoeiro. Desta volta os delincuentes levaron cruces, un cáliz e unha pila bautismal pequena, ademais de tamén moedas dos lampadarios. 

"Chegamos aquí e a nosa sorpresa foi que estaba a porta rebentada. Entraron e roubaron un cáliz, o copón, unha pía bautismal pequeniña que era moi bonita; tres ou catro cruces. Levaron varias cousas así. A cruz era moi bonita era a que se sacaba en procesións. A pía era de granito e non sei porque a roubaron", asegura Serxio Sarmiento Presidente da Asociación da Igrexa.

A porta aínda ten as marcas dunha panca de ferro. A igrexa agora está a espera dunha pechadura, pero está ben pechada e non poden entrar nin os veciños. Os residentes, desgustados, deron a alerta á Garda Civil. Acudiron ao lugar catro axentes para facer unha inspección do lugar e recoller as posibles pegadas que puideron deixar atrás os ladróns. Non é a primeira vez que rouban en Santa Mariña.  

"Xa entraron dúas veces máis, unha entraron pola sacristía, outra pola fiestra da fachada romperon o cristal e entraron por aí, pero levaron o que había nos petos nada máis. O que vén meterse a un cemiterio, a unha igrexa, a un sitio destes, que non se mete con ninguén, o que non queira vir que non veña pero isto non é normal", di Sarmiento

Os ladróns asaltaron a igrexa de madrugada, sen que ningún veciño chegase a decatarse nin ver vehículos ou sospeitosos xa que a casa máis próxima está a uns 200 metros do templo. O día do roubo o cura estivo preparando a liturxia para o día seguinte ata as nove da noite, hora na que saben con seguridade que todo estaba no seu lugar.