Rouban obxectos relixiosos por valor duns 5.000 euros nunha capela do concello de Oleiros

Pilar, a responsable da capela, foi quen descubriu o roubo ao abrila, ao día seguinte. Horas antes, uns descoñecidos, aproveitando a noite, forzaran a pechadura de seguridade. E malia que hai casas a escasos metros, ninguén se decatou de nada.

"Nada de nada. Nin escoitamos nada nin ladraron os cans. Sabían ben o que facían e a onde tiñan que ir", comenta unha veciña.

Cando xa estaban dentro, fixéronse con obxectos de valor e tamén causaron estragos.

"Partiron en dous a columna sobre a que estaba o sagrario. E roubaron varios rosarios, o sagrario, un calefactor...", explica Pilar de Francisco.

Non contentos con isto, foron remexer á sancristía... onde tamén roubaron. 

"Levaron os cálices, todo, todo. Agás as vestimentas dos sacerdotes porque serán máis complicadas de vender. Máis ou menos, uns cinco mil euros", engade Pilar.

Esta tarde, o diácono parroquial irá interpoñer a correspondente denuncia para que investiguen os feitos e poidan prender os responsables.