Rouban un coche en Oleiros e no seu lugar deixan o botín doutro furto

Dous usuarios dun garaxe veciñal da rúa Hábitat de Santa Cristina, en Oleiros, sufriron nos últimos días de 2023 cadanseu roubo cun nexo atípico. O que lle roubaron a un logo deixárono na praza de garaxe de onde fuxiron co coche que outro tiña aparcado.

Daniel é o principal prexudicado, pois segue sen aparecer o vehículo que lle levaron o día 27: "Tres días despois, doutro coche aparcado nunha praza próxima levaron unha mochila que contiña un ordenador".

Relata tamén que este luns esa mochila apareceu na praza onde aparcaba o Peugeot 108 que lle levaron. Nada máis abrir o ordenador descubriu que era o que levaron tras romper unha ventá do coche do veciño.

El non cre que haxa relación entre os dous roubos: "É un caso que eu diría propio do inspector Gadget. Non é normal que algo que roubaran nove ou dez días antes o devolvan os ladróns e o deixen na praza de garaxe onde logo roubaron un coche".

El segue á espera de que apareza o seu utilitario, e explica que nos dous roubos o acceso ao garaxe foi por puntos distintos: "Nun caso entraron polo ascensor forzando a pechadura que baixa ata o garaxe e noutro, forzaron o portón do garaxe", conclúe o dono do coche roubado.