Roubo de produtos valorados en varios miles de euros nunha nave de Fene

Os estragos que ocasionaron na porta de acceso á oficina é a pegada evidente do asalto á nave situada no polígono de Vilar do Colo, en Fene. Ante a fachada, a furgoneta recuperada onte á tarde pola Garda Civil no municipio de Ferrol. Os autores do roubo levárona cargada de caixas de viño, xamóns, queixos e outros produtos que distribúe a firma aquí instalada.

O propietario sospeita que os ladróns empregaron outro vehículo na súa acción e tamén cargaron a furgoneta da casa, tras daren coa chave no remexer da oficina á procura de cartos. Levaron o diñeiro que tiñan para as voltas de cobros en efectivos. A avaliación da mercancía está pendente de completar.

Segundo o seu dono, os vinte mil euros estimados inicialmente van quedar moi curtos. Os ladróns aproveitaron para perpetrar o roubo unha vez que pechou o negocio de hostalería do lado o domingo á tarde co que empezaba un período con moitas horas sen movemento de viandantes polos arredores ata a mañá do luns.