Roubo de xénero por valor de 35.000 euros nun comercio de Baio, Zas
Roubo de xénero por valor de 35.000 euros nun comercio de Baio, Zas
Os ladróns fixeron un percorrido pola estrada de Carballo de asaltos frustrados a outros tres negocios
O negocio asaltado este luns de madrugada está situado na rúa Bispo Romero Lema
O roubo na tenda Fanatik de Baio, en Zas, ocasionoulle á propietaria unha perda económica cuantiosa e deixou tocada a súa actividade.
O negocio, situado na rúa Bispo Romero Lema, estivo pechado onte, e esta mañá seguía igual. Todo porque o luns de madrugada lle rebentaron a pechadura da porta e arramplaron con roupa, calzado e complementos.
A tendeira estaba fóra da provincia esta mañá, precisamente, mirando mercadoría para repoñer. En conversa telefónica contounos que lle deixaron baleiras os andeis dos produtos máis cotizados.
Valora en 35.000 euros o roubado. Tamén lle levaron a caixa dos cartos cuns 500 euros en efectivo. Segundo dixo, a referencia que hai dos autores do roubo é que se movían esa noite nun turismo de gama alta e que se foron pola estrada de Carballo tras un percorrido de asaltos frustrados a outros tres negocios de Baio. Intentárono nunha cafetería, noutra tenda de moda e nunha panadería da vila.
