Un cerralleiro e o seu socio levan máis dun millón en xoias e cartos dunha caixa forte en Madrid

A Policía Nacional detivo dous homes, un deles de profesión cerralleiro, por presuntamente roubar máis dun millón e medio de euros —100.000 euros en efectivo e xoias— dunha caixa forte dun domicilio do distrito madrileño de Salamanca.

Fontes policiais aseguraron a EFE que os presuntos autores, ambos españois de 35 e 47 anos, con antecedentes por feitos similares, foron arrestados o pasado 26 de xuño tras a investigación aberta no outono pasado por axentes da comisaria do citado distrito.

A Xefatura Superior de Policía de Madrid detalla nun comunicado que un dos arrestados, o máis novo, é cerralleiro e aproveitou hai un ano a súa profesión para preparar o roubo, xa que a vítima requiriu os seus servizos e el obtivo datos do que contiña a caixa forte, que deixou "preparada" para a comisión dun posible roubo.

Tres meses despois deste servizo, perpetrouse o roubo, o cal motivou o inicio da investigación tras a presentación da denuncia.

Nesas primeiras indagacións, os axentes descubriron que os presuntos autores tamén roubaran no servizo de conserxería dese mesmo edificio as gravacións das cámaras de seguridade.

A finais do pasado mes, ambos os homes foron detidos. Un deles tiña no seu poder un reloxo roubado da vítima, polo que pasaron ao dispor da autoridade xudicial como presuntos autores dun delito de roubo con forza.

Ademais, ao cerralleiro tamén se lle imputou un delito de estafa en relación á reparación que lle realizou no domicilio, xa que lle cobrou máis de 3.000 euros por un servizo de custo inferior.