24 feridos, 7 graves, ao envorcar un autobús en Mallorca no que ían varios turistas de Lugo

24 persoas quedaron feridas na mañá deste luns en Mallorca ao caer por un terraplén duns dous metros de altura e envorcar o autocar en que viaxaban medio cento de turistas do Imserso.

Entre os viaxeiros do autobús había persoas procedentes de diversas localidades da península, boa parte deles de Zaragoza e Lugo. Non obstante, polo momento non se detallou a procedencia dos feridos e non se sabe se hai galegos entre os ingresados nos hospitais das Illas Baleares.

Segundo informaron a EFE fontes do servizo de emerxencias sanitarias 061 e da Garda Civil, o balance final do sinsitro é de sete feridos graves, 17 leves e 30 viaxeiros ilesos, incluído o condutor.

Outros sete viaxeiros sufriron feridas leves das que foron atendidos no lugar dos feitos, e o resto dos ocupantes do vehículo, 40 pasaxeiros e o condutor, resultaron ilesos.

Dez persoas foron trasladadas ao hospital de Manacor, 5 ao hospital Son Espases de Palma, 5 ao de Llevant, 5 ao de Son Llàtzer e 2 ao hospital de Muro.

Entre estes trasladados atópanse tres familiares ilesos de persoas feridas e tamén a vítima con lesións máis graves, que foi levada en helicóptero a Son Espases.

O accidente produciuse ás 10:00 horas no quilómetro a estrada entre Sant Lloreç e Son Servera (Ma-4030) en circunstancias que investiga a Garda Civil, aínda que, en principio, descartouse a intervención doutros vehículos.

Fontes do instituto armando detallaron que o condutor do autocar deu negativo nas probas de alcol e drogas ás que foi sometido.

O 061 desprazou ata o lugar seis ambulancias de soporte vital básico, catro de soporte vital avanzado, un vehículo medicalizado de transporte colectivo, un helicóptero e un hospital de campaña.

A presidenta do Govern balear, Marga Prohens, que se reúne este luns cos presidentes dos Consells Insulars, sinalou que o seu gabinete estivo pendente do accidente e destacou a mobilización de medios para atender ás vítimas, ás que desexou "unha rápida recuperación".

O servizo balear de saúde habilitou o número de teléfono 900 712 112 para informar as familias dos afectados do seu estado e evolución.