Morre un piloto galego no choque de dúas aeronaves nun festival aéreo en Portugal
Morre un piloto galego no choque de dúas aeronaves nun festival aéreo en Portugal
O accidente, que causou ademais un ferido de nacionalidade lusa, ocorreu na localidade de Beja, no sur do país
O falecido era integrante da patrulla acrobática ibérica Yakstars, constituída por españois e portugueses
O piloto galego Manuel Rey Cordeiro morreu este domingo despois de que o avión que conducía chocara con outro durante un festival aéreo na localidade de Beja (no sur de Portugal), nun accidente que causou ademais un ferido de nacionalidade lusa.
O falecido, nado en Vigo no 1962 e residente en Sigüeiro, era piloto da patrulla acrobática ibérica Yakstars, constituída por españois e portugueses, e participaba no festival Beja AirShow, informou nun comunicado a Forza Aérea Portuguesa.
Manuel "Coco" Rey Cordeiro pilotando un dos aparellos de acrobacia aérea /Arquivo
O piloto da outra aeronave, de nacionalidade portuguesa e da mesma patrulla, quedou ferido leve e foi asistido polos servizos médicos no lugar do accidente. Posteriormente, foi conducido ao hospital de Beja "por precaución", explicou a Forza Aérea.
O accidente produciuse ás 16:00 horas e o evento foi inmediatamente interrompido. Un dos avións caeu fóra do perímetro da base aérea onde se celebraba o festival e o outro aterrou na unidade.
A Forza Aérea expresou o seu "pesar e consternación" polo ocorrido e trasladoulle as súas condolencias á familia da vítima. As causas do accidente están baixo investigación.
Yakstars é o maior equipo civil de exhibición acrobática do sur de Europa e un dos maiores do mundo, segundo a páxina web da Forza Aérea. Ten como bases Casarrubios, en España, e Ponte de Sôr, en Portugal.
