Un policía fóra de servizo detivo en Vigo un home que intentaba roubar un coche cunha muller e os seus fillos dentro

Un policía fóra de servizo detivo en Vigo un home que intentaba roubar un coche cunha muller e os seus fillos dentro. O arrestado introduciuse no vehículo e ameazounos cun coitelo.

A maxistrada do Xulgado de Instrución número 3 de Vigo decretou o ingreso do detido en prisión provisional, comunicada e sen fianza. Ademais, segundo confirmou o Tribunal Superior de Xustiza de Galicia, está investigado por roubo con violencia, detención ilegal, atentado e lesións.

Ocorreu pouco antes das 4 da tarde deste martes na rúa Tomás Alonso da cidade. Segundo testemuñas presenciais, un home de mediana idade introduciuse no vehículo aproveitando que o condutor baixara do coche e o deixara en marcha coas chaves postas. Nese momento, a súa muller e os dous fillos, un deles un bebé, atopábanse no interior.

O individuo sacou un coitelo e ameazounos para emprender a continuación unha fuxida que non chegou moi lonxe. O pai da familia, ao ver que o home levaba o vehículo con eles dentro, comezou a correr tras el mentres berraba pedindo auxilio. Uns berros que escoitou un policía nacional que estaba fóra de servizo.

El oficial Rivas nos explica cómo fue la intervención en la que consiguió detener al hombre que intentó robar un coche con una familia dentro, cuando se encontraba fuera de servicio#Vigo https://t.co/XvNibi5Ekn pic.twitter.com/iHlPZNZLY4

— Policía Nacional (@policia) September 25, 2024

O axente colleu a súa moto e perseguiuno, cruzouse diante del e cortoulle o paso. A continuación achegouse ao lado do condutor, abriu a porta, sacou o home e forcexou con el ata que logrou reducilo.

Ademais, agradeceu a un cidadán que lle deixou o seu teléfono para chamar ao 091. A continuación, os seus compañeiros da Policía Nacional procederon á detención do condutor.

Finalmente o ladrón foi arrestado e trasladado a dependencias da Policía Nacional.