Un rescate complicado polas condicións do río, a inestabilidade do vehículo e a falta de luz

Os bombeiros do parque municipal de Pontevedra foron os que levaron a cabo o rescate das vítimas durante a noite. Dúas unidades saíron cara a Cerdedo-Cotobade en canto recibiron o aviso e á chegada atoparon o autobús no medio do río e comezaron a inspección, como relatou César Labo, cabo do parque de bombeiros de Pontevedra.

"O escenario era un autobús no medio do leito do río cunha corrente e un caudal perigoso e elevado. Houbo que montar un sistema para poder descender ata o autobús e darlle asistencia á persoa que estaba viva, que ao final eran dúas as persoas vivas". 

Unha vez evacuadas as vítimas vivas continuou o rescate dos corpos localizados nunhas condicións difíciles polo estado do río, a falta de luz e a inestabilidade do vehículo. 

"Cando chegamos a auga estaba á altura do volante do vehículo, estábase metendo dentro do autobús facendo turbulencias e a medida que foi pasando o tempo foi crecendo o nivel de auga e o caudal ata que ao final case non había espazo para traballar. Despois das revisións que fixemos e ao non localizar a ninguén máis, unha vez que subiu o último rescatador suspedéronse os labores de busca ata esta mañá". 

Aínda que están afeitos aos traballos de rescate complicados, esta Noiteboa quedará marcada por unha traxedia coa que ningún contaba.