Ferido leve o piloto dunha avioneta no aeródromo de Rozas

O accidente da avioneta bipraza rexistrouse pouco antes das dúas da tarde no aeródromo de Rozas, no concello de Castro de Rei. Un particular avisou do sinistro ao 112.

Xusto cando acababa de engalar, caeu á pista. Por fortuna, a aeronave ía a moi pouca altura e o impacto foi aparatoso pero non grave.

O piloto da avioneta bipraza, que viaxaba só, puido saír polo seu propio pé e non presentaba feridas de gravidade. Parece que un insecto foi o que provocou o accidente.

Ata o lugar desprazáronse os bombeiros de Vilalba e Lugo e a Policía Autonómica. Tamén se mobilizou un helicóptero medicalizado do 061, que finalmente non chegou a trasladarse.