Unha empresa de Taboada vende máis de mil bombonas de gas en 48 horas

En tan só 48 horas, unha empresa de Taboada vendeu por Internet máis dun milleiro de pequenas bombonas de gas. O seu uso está destinado aos fogóns de cámping, dos que tamén se dispararon as vendas por temor a un apagamento eléctrico de carácter global.

Independentemente de que chegue a servir de algo facer abastecemento de recipientes de gas nese suposto, o caso é que a compañía soubo aproveitar a oportunidade de negocio que lle brinda a crise enerxética.

Sonia Ayude, empregada da compañía: "Foi dun día para outro, chegar o luns e o mércores non termos nada xa. Foi empaquetar e non saír de aí. Vendemos máis de mil e seguiron entrando pedidos. Xa habemos de andar polos 1.800, e xa logo nos chega máis mercadoría". 

Non é, de feito, a primeira crise da que souberon sacar proveito. Cómpre lembrar que só en dous días de xaneiro do ano pasado a mesma empresa vendera 150.000 máscaras, sobre todo aos países asiáticos que comezaban a afrontar a pandemia. 

"Isto xa é a segunda vez que nos sucede. A primeira fora co tema das máscaras, que saltara dun día para outro, e menos mal que tiñamos stock suficiente e fómolo levando. Agora intentamos facer o mesmo que fixeramos coas máscaras e servir os pedidos".

Nesta ocasión, a maior parte dos pedidos de bombonas limítase, polo momento, ao ámbito da Península Ibérica. Curiosamente, Lisboa é un dos lugares a onde se envía máis mercadoría.