Unha liorta por drogas acaba cun acoitelamento en Lugo

Unha liorta por drogas acabou cun acoitelamento en Lugo na madrugada deste luns ao martes a raíz dunha forte discusión entre dous toxicómanos na zona do Camiño Real.

Un dos implicados acabou sacando unha navalla e cravándolla ao outro na perna para despois fuxir deixándoo malferido. Varias testemuñas da agresión avisaron os servizos de urxencias que trasladaron a vítima ao hospital.

A policía localizou pouco despois o suposto agresor. Hai apenas tres semanas producíase en Lugo outro episodio semellante, neste caso nunha vivenda, tamén a raíz dunha discusión por drogas.