Unha vertedura de xurros enfronta dous veciños do Corgo

No concello do Corgo, hai unha veciña da parroquia de Marei, chamada Julia, que leva tres anos en pé de guerra contra o seu veciño. O motivo é un pendello pegado á súa leira onde hai entre dez e doce vacas vinte e catro horas ao día os 365 días do ano. Julia López sinala que os xurros fíltranse ao terreo e contaminan o seu pozo.

Todas as analíticas feitas indican que debido á cantidade de coliformes e de fecais, a auga do pozo non é potable. Ao non ter auga da traída ten que empregar garrafas de auga para beber, cociñar e ata asearse.

O Concello do Corgo decretou o 11 de febreiro do 2022 que o propietario das vacas tiña que legalizar o pendello, o problema é que segundo apunta Julia, o seu veciño non solucionou as deficiencias existentes. Asegura que a construción segue a ser ilegal, xa que non está acondicionada para a actividade gandeira e non cumpre cos retranqueos esixidos.

Pola súa parte, o veciño non quixo dar a súa versión dos feitos.