Detido un home por atracar un banco en Ourense cunha pistola simulada
Detido un home por atracar un banco en Ourense cunha pistola simulada
O detido subtraeu varios miles de euros empregando unha arma que resultou ser simulada
Os axentes da Policía Nacional indicaron que o home tentou roubar noutra sucursal bancaria momentos antes do atraco
![](https://img-g24-crtvg.flumotion.com/prog24/2023/20231201/PISTOLASIMULADAOURENSE.png)
Axentes da Policía Nacional detiveron a un home como presunto autor dun roubo ocorrido nunha sucursal bancaria no centro de Ourense. Os feitos sucederon na tarde deste xoves e sinalan que o autor subtraeu varios miles de euros empregando unha arma que resultou ser simulada.
Segundo contaron testemuñas aos axentes policiais, o home accedera ao local e intimidou a un dos empregados utilizando unha arma e esixindo o diñeiro da caixa. Unha vez co botín, o varón emprendeu a fuxida cara á zona do Vao, aínda que xa se dera alerta do suceso.
De inmediato, a Policía Nacional, realizou unha despregadura con que lograron localizar o presunto autor do roubo. Unha vez detectou a presenza policial, o home iniciou unha fuga que finalizou nas inmediacións do Parque do Miño, onde puido ser detido. Sen embargo, a detención non foi fácil xa que o home opuxo resistencia e tres dos policías que interviñeron quedaron feridos.
Unha vez arrestado, foille intervido o diñeiro procedente do botín, que portaba escondido e repartido por diferentes petos e zonas do corpo. Tamén foi atopada a arma coa que, supostamente, perpetrou o atraco, que resultou ser unha pistola simulada.
Os axentes indicaron que, durante a investigación, souberon que o detido, momentos antes do atraco, tentara roubar nunha entidade bancaria próxima. Sen embargo, despois de forcexar cun dos empregados, aos que golpeou cun obxecto na cabeza, non logrou acceder ao interior e decidiu abandonar o lugar.