Deteñen catro rapaces de 15 a 17 anos por agresión sexual a dúas menores

A Policía Nacional detivo catro homes de entre 15 e 17 anos pola súa suposta relación con  senllas agresións sexuais sufridas este luns por dúas mozas menores de idade no municipio valenciano de Burjassot.

Así o confirmaron a EFE fontes policiais sen que polo momento se coñezan máis detalles sobre como e onde se produciu o suceso nin as idades das vítimas.

A Unidade de Atención á Familia e Muller (UFAM) da Policía Nacional investiga esas agresións sexuais que sufrirían dúas mozas menores de idade, ocorridas nun punto non especificado da citada localidade valenciana.

Segundo o periódico Levante-EMV, a violación grupal a unha nena de 12 anos en Burjassot e unha violación individual a outra menor da mesma idade ocorreron no mesmo lugar, despois de que as nenas quedasen con dous mozos a través da rede social Instagram.

Segundo este xornal unha das nenas foi violada por un dos mozos, tras o que logrou abandonar a casa, e foi a que avisou a unha terceira amiga, que alertou aos seus pais do que pasaba, mentres que outros catro novos amigos dos dous primeiros acudiron ao lugar e violarían en grupo a outra nena.

Durante este mércores, os medios de comunicación fotografaron e gravaron unha casa abandonada como posible lugar dos feitos, un inmoble situado xunto ao límite co próximo municipio de Godella e á beira dun parque frecuentado por adolescentes, aínda que a Policía non confirmou que o suceso se cometera neste enclave, sobre o que non pesa ningún precinto policial.

A delegada do Goberno na Comunidade Valenciana Gloria Calero afirmou á primeira hora deste mércores que non é posible que sigan pasando agresións sexuais e reclamou actuacións contundentes para educar en valores os adolescentes.

"Triste noticia", lamentou  Calero, para engadir que non existe unha educación sexual en condicións e "non pode ser" que os adolescentes se eduquen no sexo "a partir da pornografía", e lembrou que a lei do aborto tamén incide na educación sexual.

"En Educación temos que actuar máis contundentemente, é o momento de coller o touro polos cornos, non é posible que isto siga pasando", reiterou en declaracións aos medios de comunicación.

O Concello de Burjassot condenou a presunta agresión sexual e, a través do seu alcalde Rafa García, púxose ao dispor das forzas e corpos de seguridade do Estado e da Xustiza para o que sexa necesario a fin de esclarecer este posible novo caso de violencia sexual.

"Nin unha máis, non é admisible a violencia contra as mulleres. Nunca. Estaremos e estamos coas vítimas de calquera violencia ou agresión sexual, defendéndoas e axudándoas en todo o que sexa necesario. Confiamos na Xustiza e nas Forzas e Corpos de Seguridade do Estado", declarou o alcalde.

Nun comunicado, o consistorio indica que conta cun importante equipo de traballo de Servizos Sociais, incluídas as áreas de Igualdade, e Infancia e Menores, que desde hai anos desenvolve proxectos de concienciación, programas contra a violencia de xénero e educación en valores, programas para o bo uso das redes sociais e proxectos de infancia.

Así mesmo, desenvolve programas multidisciplinares nos centros educativos para loitar contra a violencia de xénero e para educar en liberdade os menores do municipio.