Deteñen tres persoas na Coruña, Alacant e Ceuta por distribuír pornografía infantil
Deteñen tres persoas na Coruña, Alacant e Ceuta por distribuír pornografía infantil
Os sospeitosos empregaban unha aplicación de mensaxería instantánea para intercambiar arquivos, principalmente vídeos, algúns deles de gran dureza, debido á curta idade dos menores que aparecían neles
Imaxe de arquivo
Axentes da Policía Nacional detiveron tres persoas na Coruña, Alacant e Ceuta, acusadas de distribuír contido pornográfico infantil a través dunha aplicación de mensaxería instantánea. Hai ademais unha cuarta persoa investigada en Madrid.
Segundo explican os investigadores, os arrestados compartiran decenas de vídeos -algúns deles de gran dureza, debido á curta idade dos menores que aparecían neles- e almacenaban numerosos arquivos de abuso sexual infantil nos seus dispositivos.
A aplicación utilizada polos detidos para difundir os arquivos permite aos usuarios rexistrarse de forma anónima, sen necesidade de facer visibles os seus datos nin o número de teléfono, polo que é habitualmente utilizada polos delincuentes para evitar ser detectados.
A investigación iniciouse por axentes da Unidade Central de Ciberdelincuencia (UCC), dentro dos labores preventivos de ciberpatrullaxe para a loita contra a difusión de arquivos de material de abuso sexual infantil a través da web.
No transcurso da investigación, os policías detectaron unha intensa actividade, por parte de catro individuos, nunha aplicación de mensaxería instantánea a través da cal compartirían decenas de vídeos de pornografía infantil.
O usuario detido na Coruña compartiu 29 vídeos moi explícitos a través desa plataforma. Os axentes detectaron que, ademais, se valía doutras aplicacións de mensaxería instantánea e de chats para adolescentes co propósito de contactar con eles e obter material pornográfico infantil.
O arrestado no municipio alacantino de Altea enviara polo menos 36 vídeos de gran dureza. Trátase dun home de nacionalidade inglesa e residente en España. O xulgado decretou a retirada do seu pasaporte e a prohibición de saída de España ante a existencia dun posible risco de fuga.
O arrestado en Ceuta gardaba centos de fotos e vídeos de pornografía infantil nun cartafol oculto do seu teléfono móbil, así como no disco duro do seu computador. Enviou a través da aplicación numerosas fotos e vídeos, algúns dos cales estaban protagonizados por bebés.
Ademais, en Madrid localizouse a outro individuo ao que se investiga por distribuír varios arquivos deste tipo, aínda que durante o rexistro do seu domicilio os axentes observaron que cambiara o seu modus operandi para facelo a través da dark web, o que cren que dificulta a acción da xustiza.
Como resultado dos rexistros realizados, os investigadores interviñeron tres teléfonos móbiles, tres discos duros, dúas memorias USB e un computador portátil.
