Detida unha persoa por colocar cámaras ocultas en habitacións dun hotel de Bóveda
Detida unha persoa por colocar cámaras ocultas en habitacións dun hotel de Bóveda
As cámaras estaban agochadas detrás dun reloxo pendurado nun dos cuartos do hotel
O asunto foi denunciado por unha parella que se aloxaba no establecemento
Garda Civil
A investigación comezou a finais do ano pasado tras a denuncia dunha parella que se aloxaba nun hotel de Bóveda e que atopou unha cámara escondida detrás dun reloxo colgado na parede.
Os denunciantes detectaron un reflexo xusto detrás do reloxo cando apagaron a luz da habitación e comprobaron que, na parte traseira, estaba agochada unha minicámara que enfocaba cara á cama. O dispositivo dispoñía dunha tarxeta micro SD de gravación de imaxes.
A parella avisou aos hóspedes do cuarto contiguo e comprobaron que tamén había outra cámara de características similares escondida noutro reloxo.
Cando comunicaron estes feitos ao propietario do establecemento, este indicoulles que as cámaras non funcionaban e devolveulles o importe pagado polo aloxamento, e mais outros 300 euros, coa intención de que non presentasen denuncia.
Os axentes iniciaron a operación Norbates. Durante as investigacións recibiron outra denuncia doutra persoa clienta do mesmo hotel, que mesmo presentou como proba o reloxo coa cámara.
Realizouse un rexistro no hotel e outro no domicilio do propietario no que se interviñeron dous computadores portátiles, unha CPU, un disco duro externo, 15 pendrives, unha minicámara e tres reloxos.
A operación continúa aberta. Os axentes analizan as gravacións intervidas para verificar se estas imaxes estaban destinadas a uso propio, difusión en liña ou para comerciar con elas.
Gravacións no aseo dunha farmacia de Tarazona
A Garda Civil detivo outro home en Tarazona (Zaragoza) por colocar unha cámara de gravación no aseo da farmacia en que traballaba como informático. A investigación iniciouse a primeiros deste mes de xullo cando se recibiu a denuncia dunha das empregadas que descubrira a cámara nos baños orientada cara ao inodoro.
A cámara de gravación incluía a electrónica necesaria para almacenar as imaxes nunha tarxeta de memoria de 32 GB e un power bank que fornecía a enerxía suficiente á cámara para que puidese funcionar durante varias semanas.
Os investigadores comprobaron que o detido adquirira a cámara un ano antes e que podería estar en funcionamento nos aseos desde o pasado mes de maio. Trátase dun veciño de Tarazona ao que se lle atribúe un delito contra a intimidade.
