España envía axuda a Libia

O Ministerio de Defensa enviou a Libia equipos de protección e material para facilitar as tarefas de desentullo e limpeza tras as inundacións do ciclón Daniel, que azoutou o nordés do país e causou polo menos 11.300 falecidos e máis de 10.000 desaparecidos.

En total mandáronse tres toneladas de axuda achegada pola Unidade Militar de Emerxencias co obxectivo de previr a propagación de infeccións, informou este luns nunha nota o Ministerio, que coordinou o envío coa Axencia Española de Cooperación Internacional para o Desenvolvemento. 

"Os esforzos de socorro inmediato céntranse na área da cidade de Derna, a cuarta máis importante do país, que viu como barriadas enteiras cos seus residentes foron arrastradas literalmente ata o mar por mor da riada provocada polo colapso de dous represas como consecuencia da choiva torrencial", detalla Defensa.

Ademais desta primeira remesa, os Exércitos e a Armada están "a ultimar" outros envíos para "aliviar na medida do posible o sufrimento do pobo libio", engade o comunicado.

Precisamente este luns a Unión Europea informou do envío de 5,2 millóns de euros en fondos humanitarios a Libia ante o "dramático aumento das necesidades" do país, unha axuda que se canalizará a través dos socios humanitarios da UE.