Os canteiráns do Real Madrid, libres á espera da investigación xudicial

Os catro canteiráns do Real Madrid investigados por difundir un vídeo sexual cunha menor agardan a que remate a investigación xudial. Quedaron libres despois de declarar ante a Garda Civil e da análise dos seus móbiles. O atestado vai ser remitido ao xulgado das Palmas onde se presentou a denuncia.

Foi a nai da menor a que denunciou nas Palmas a existencia dun vídeo que contiña relacións sexuais da súa filla de 16 anos cun dos detidos. Eran consentidas pero, segundo a denuncia, en ningún momento autorizou que foran gravadas e difundidas.

As pescudas levaron a Garda Civil ata a cidade deportiva de Valdebebas. Alí detivo o presunto autor da gravación e dous futbolistas aos que supostamente lles pasou o vídeo e citou un cuarto en calidade de investigado. 

Todos quedaron en liberdade despois do interrogatorio dos axentes e á espera do que decida o xuíz, que podería tomarlles declaración por videoconferencia.

A análise dos seus móbiles vai ser determinante na investigación para verificar a difusión desas imaxes e con quen as compartiron. 

Enfrontanse a un presunto delito de revelación de segredos de índole sexual penado con ata cinco anos de prisión. 

Tres xogan no Real Madrid C e un no Castela. Nun comunicado o club di que adoptará medidas cando saiba con detalle que pasou. 

O delegado do Goberno en Canarias confirma que se avanza na investigación pero que hai que agardar. "Se lles retiraron os móbles para analizar o seu contido. A partir de que ese contido se analice, se poderá corroborar se esa denuncia pode ser correcta ou non. Temos que agardar, agardar ademáis pola investigación xudicial", di Anselmo Pestana.