Aumentan a oito os mortos no afundimento do Argos Georgia nas Malvinas, dous deles galegos
Aumentan a oito os mortos no afundimento do Argos Georgia nas Malvinas, dous deles galegos
Un dos galegos falecidos é o patrón de pesca, da parroquia viguesa de Valadares. O outro é o cociñeiro, de Baiona
Aínda hai cinco desaparecidos, dous deles españois, un galego
Entre os catorce sobreviventes estarían o capitán, o primeiro oficial e o xefe de máquinas, todos de Ribeira
Os familiares das vítimas do Villa de Pitanxo envían unha mensaxe de condolencia e solidariedade por esta nova traxedia
Emerxencia nun pesqueiro con tripulación galega que sufriu unha vía de auga
As últimas informacións facilitadas polo servizo de Salvamento das Malvinas sitúan en oito os falecidos no naufraxio do 'Argos Georgia', a unhas 170 millas desas illas. Hai cinco desaparecidos e catorce superviventes. Así o comunicaba contra a medianoite a Delegación do Goberno en Galicia.
Dous dos mortos eran galegos, como un desaparecido e 3 superviventes
Un dos galegos falecidos era o patrón de pesca, natural da parroquia viguesa de Valadares. O outro, o cociñeiro, do municipio pontevedrés de Baiona.
Entre os que sobreviviron estarían o capitán, o primeiro oficial e o xefe de máquinas, todos de Ribeira e que xa falarían coas súas familias. Da localidade coruñesa tamén é un dos desaparecidos.
Todos os superviventes están ben
Desde a Delegación do Goberno en Galicia din que, atendendo aos informes recibidos, os sobreviventes están ben; unicamente se deu conta de lesións leves e de doenzas pouco importantes. O hospital King Edward VII Memorial, nas Malvinas, está preparado para recibilos.
Case trinta horas despois de que saltasen ás balsas salvavidas, a patrulleira de inspección pesqueira local 'Lilibet' navega en dirección ao porto de Stanley con 13 dos rescatados.
O outro permanece no arrastreiro 'Robin M. Lee', participado por unha empresa de Vigo, que tamén recuperou un dos cadáveres. A súa intención era permanecer na zona toda a noite. Outros dous corpos recuperounos o pesqueiro 'Puerto Toro'.
27 persoas a bordo
Polo que transcendeu, ademais dos españois -dous deles observadores científicos-, no 'Argos Georgia' había tripulantes rusos, indonesios, uruguaios e peruanos.
A media tarde, en hora galega, a Armada arxentina recibía a alerta de activación da radiobaliza do buque, con bandera de Santa Elena. Estaba a unhas 170 millas do porto de Stanley, nas illas Malvinas. Había mala mar e forte vento.
Arredor dun par de horas despois, a tripulación comunicaba que o barco tiña unha vía de auga e que ían saltar ás balsas salvavidas. O palangreiro acabou indo a pique.
Segundo a Subdelegación do Goberno en Pontevedra, o barco afundiuse de madrugada.
O presidente Rueda di que a Xunta segue ao minuto a operación de rescate dos mariñeiros e agarda que estean a salvo canto antes.
Este mércores, familiares das vítimas do naufraxio do Vila de Pitanxo quixeron lanzar unha mensaxe de condolencia e solidaridade coas familias.
