Detido un xuíz da Federación de Vela por acosar tres regatistas menores en León
Detido un xuíz da Federación de Vela por acosar tres regatistas menores en León
As denunciantes son tres rapazas de entre 14 e 17 anos naturais de Galicia e León
Imaxe de arquivo
Un xuíz de competición da Federación de Vela de Castela e León foi detido e sometido a un xuízo rápido este luns pola denuncia de acoso de tres menores que participaban como regatistas nunha proba da fin de semana no encoro de Barrios de Luna de León, que foi suspendida a causa deste incidente.
O home, de 48 anos, foi detido tras as denuncias das menores, de entre 14 e 17 anos, procedentes de Galicia e de León.
As rapazas acúsano de proferir comentarios inapropiados e de manter "contacto físico" con elas, aínda que a Garda Civil precisa que, ao parecer, en ningún momento houbo agresión sexual.
Tras a denuncia presentada polas menores, a Federación de Castela e León de Vela optou por suspender a proba que se estaba celebrando no encoro de Barrio de Luna, mentres que o Club Náutico de León, ao que pertencen as menores, actuará como acusación particular.
Os feitos producíronse na festa nocturna posterior á segunda xornada da competición, na que se congregaron 80 deportistas de entre 10 e 50 anos das categorías absoluta, feminina, xuvenil e feminina xuvenil, segundo explicou o vicepresidente da Federación de Castela e León de Vela, Ángel Puente.
Desde a organización activouse de inmediato o protocolo establecido para os casos contra a liberdade sexual, confinando o denunciado no recinto á espera da chegada dos axentes do instituto armado e cancelando a competición, da que aínda quedaba unha xornada.
As denuncias enviáronse ao comité de acoso para a apertura dun expediente na Federación Española e o Consello Superior de Deportes (CSD) e para aclarar as circunstancias e determinar as posibles medidas que adoptar.
